തായ്‌ലന്‍റ്, ജപ്പാൻ എന്ന ഏഷ്യൻ രാജ്യങ്ങളില്‍ തന്‍റെ മുപ്പത്തി രണ്ടാമത്തെ അപ്പോസ്തോലിക സന്ദർശനം നടത്തുന്ന ഫ്രാൻസിസ് പാപ്പാ തായ്‌ലന്‍റിലെ ദേശീയ മൈതാനത്തിൽ അർപ്പിക്കപ്പെട്ട ദിവ്യബലി മദ്ധ്യേ നല്‍കിയ വചന സന്ദേശം. ഗുരുവിന്‍റെ ചോദ്യങ്ങൾ സമൂഹത്തിന്‍റെ നവീകരണത്തിനാണ് "ആരാണ് എന്‍റെ അമ്മ, ആരാണ് എന്‍റെ സഹോദരർ" എന്ന മത്തായിയുടെ സുവിശേഷ വചനം വിശദീകരിച്ചു കൊണ്ട് ആരംഭിച്ച തന്‍റെ വചനപ്രഘോഷണത്തിൽ നമ്മുടെ കുടുംബാംഗങ്ങൾ, ബന്ധുക്കൾ, സ്നേഹിതർ ആരൊക്കെയാണെന്ന ചോദ്യത്തിന് ഉത്തരം നല്‍കിക്കൊണ്ട് യേശു അന്നുവരെ നിലനിന്നിരുന്ന മത, നിയമ തീർച്ചകളെ നിലംപരിശാക്കി, ശിഷ്യരുടെ ഹൃദയങ്ങളെ ത്രസിപ്പിക്കുകയും തകിടം മറിക്കുകയും ചെയ്ത്, അവരെ സത്യാന്വേഷികളാക്കുകയും ജീവൻ പകരുന്നവയിലേക്ക് ഇറങ്ങി പുറപ്പെടാൻ ക്ഷണിക്കുകയും ചെയ്യുന്ന ചോദ്യങ്ങള്‍ സുവിശേഷത്തിൽ അനവധിയുണ്ടെന്നത് ആശ്ചര്യകരമാണെന്ന് ഫ്രാൻസിസ് പാപ്പാ ചൂണ്ടിക്കാട്ടി. ഇത്തരം ചോദ്യങ്ങൾ ഹൃദയത്തെയും മനസ്സിനെയും തുറന്ന് നമുക്ക് സങ്കൽപ്പിക്കാൻ പോലും കഴിയാത്ത പുതുമയെ കണ്ടെത്താൻ നമ്മെ വെല്ലുവിളിക്കുകയും ചെയ്യുന്നു. ഗുരുവിന്‍റെ ചോദ്യങ്ങൾ നമ്മുടെയും സമൂഹത്തിന്‍റെയും ജീവിത നവീകരണത്തിനായാണ്. ഇതായിരുന്നു ഇവിടെ കാലു കുത്തിയ മിഷനറിമാരുടെ കാര്യവും. പാപ്പാ ഉദ്ബോധിപ്പിച്ചു. ഞായറാഴ്ച മേശയിൽ കാണാതിരുന്ന അമ്മമാരും സഹോദരരും കർത്താവിന്‍റെ വചനം ശ്രവിച്ച്, അതിന് പ്രത്യത്തരമായി രക്തബന്ധത്തിനും,സംസ്കാരങ്ങൾക്കും, പ്രദേശങ്ങൾക്കും, ഗോത്രങ്ങൾക്കുമപ്പുറമുള്ള ഒരു വലിയ കുടുംബത്തിലെ അംഗങ്ങളാണെന്ന തിരിച്ചറിവിൽ, പരിശുദ്ധാത്മാവിന്‍റെ ശക്തിയാൽ അവര്‍ അതുവരെ അറിയാതിരുന്ന കുടുംബാംഗങ്ങളെ തേടിയിറങ്ങി. വിഭാഗീയതയുടെ വിശേഷണങ്ങളെ മാറ്റി നിറുത്തുന്ന ഒരു നവീന ചിന്താഗതിയിലേക്ക് അവരുടെ ഹൃദയം തുറക്കേണ്ടി വന്നു. അങ്ങനെ അവർക്ക് ഞായറാഴ്ച മേശയിൽ അതുവരെ കാണാതിരുന്ന ധാരാളം ‘അമ്മമാരേയും സഹോദരരെയും' കണ്ടെത്താൻ ഇടയാക്കി. അത് അവർക്കുള്ളത് നൽകാൻ മാത്രമല്ല ദൈവവചനം മനസ്സിലാക്കാനും വിശ്വാസത്തിൽ അവർക്ക് സ്വയം വളരാനും ആവശ്യമായത് സ്വീകരിക്കാനും ഇടയാക്കി എന്ന് ഫ്രാൻസിസ് പാപ്പാ വിശദീകരിച്ചു. അത്തരം ഒരു കണ്ടുമുട്ടലില്ലായിരുന്നുവെങ്കിൽ ക്രൈസ്തവ സമൂഹത്തിന് നിങ്ങളുടെ മുഖം നഷ്ടമാകുമായിരുന്നു. തായ്ലന്‍റിന്‍റെ പുഞ്ചിരി നിറയുന്ന പാട്ടുകളും നൃത്തങ്ങളും നഷ്ടമാകുമായിരുന്നു എന്നും പാപ്പാ അറിയിച്ചു. മിഷനറി വിശ്വാസത്തിന്‍റെ കൂലിവേലക്കാരനോ മതപരിവർത്തകനോ അല്ല ഒരു മിഷനറി വിശ്വാസത്തിന്‍റെ കൂലിവേലക്കാരനോ മതപരിവർത്തകനോ അല്ല മറിച്ച് സകലർക്കുമായുള്ള യേശുവിന്‍റെ അനുരഞ്ജനത്തിന്‍റെ ദാനം സ്വീകരിക്കാന്‍ കഴിയാതെ പോകുന്ന സഹോദരീ സഹോദരരെയും അമ്മമാരേയും തേടുന്ന എളിയ ഭിക്ഷുവാണ്. വിരുന്നൊരുക്കി, തെരുവിൽ നിന്ന് എല്ലാവരേയും വിരുന്നിന് ക്ഷണിക്കുന്ന (മത്താ: 22,4-9) ക്രിസ്തുവിന്‍റെ ക്ഷണം നമ്മെ നമ്മുക്കപ്പുറത്ത് എത്തിക്കുന്നു. അത് നമ്മുടെ തന്നെ സത്യത്തിന്‍റെ നിറവും, നമ്മുടെ സുവിശേഷവൽക്കരണ പ്രവർത്തനങ്ങളുടെ ഉറവിടവും പ്രചോദനവുമാണെന്ന് പാപ്പാ ഉദ്ബോധിപ്പിച്ചു. സിയാമിൽ അപ്പോസ്തലിക വികാരിയേറ്റ് സ്ഥാപനത്തിന്‍റെ 350 വർഷം തികയുന്ന ആഘോഷം (1669-2019) ഒരു പഴമയുടെ ഗൃഹാതുരത്വമല്ല മറിച്ച് രണ്ടു മിഷനറിമാർ അന്നു ചെയ്തതുപോലുള്ള ഉറച്ച തീരുമാനത്തോടും, ശക്തിയോടും, വിശ്വാസത്തോടും കൂടെ സാഹചര്യങ്ങളോടു പ്രതികരിക്കാനുള്ള പ്രത്യാശയുടെ തീ നാളമാണ് നമുക്ക് വേണ്ടതെന്ന് പാപ്പാ ആഹ്വാനം ചെയ്തു. കർത്താവിന്‍റെ പ്രേഷിത ശിഷ്യര്‍ കർത്താവിന്‍റെ കുടുംബത്തിലെ ജീവന്‍റെ ഭാഗമാകാൻ തീരുമാനിക്കുമ്പോൾ നാമെല്ലാവരും പ്രേഷിത ശിഷ്യരായി മാറും. കർത്താവു ചെയ്തതുപോലെ, പാപികളോടൊത്ത് ഭക്ഷണം കഴിച്ചും അവർക്കും പിതാവിന്‍റെ മേശയിലും ഈ ലോകത്തിന്‍റെ മേശയിലും ഇടമുണ്ടെന്ന് അവരെ ബോധ്യപ്പെടുത്തിയും, അശുദ്ധരെ സ്പർശിച്ചും, സ്പർശിക്കാൻ അനുവദിച്ചും ഒക്കെ ചെയ്തു കൊണ്ടാണ് നാം ഇത് ചെയ്യേണ്ടതെന്നും പാപ്പാ ഓർമ്മിപ്പിച്ചു. സുവിശേഷവൽക്കരണം നമ്മെ ഒറ്റ കുടുംബമാക്കുന്നു വചനപ്രലോഷണത്തിൽ വ്യഭിചാരത്തിനും മനുഷ്യക്കടത്തിനും ഇരയാകുന്ന കുട്ടികളെയും, സ്ത്രീകളെയും മയക്കുമരുന്നിന് ഇരയായ യുവതി യുവാക്കളേയും, കുടിയേറ്റക്കാരേയും, അനുസ്മരിച്ച പാപ്പാ അവരും നമ്മുടെ കുടുംബാംഗങ്ങളാണെന്നും, നമ്മുടെ അമ്മമാരും സഹോദരി സഹോദരന്മാരാണെന്നും, നമ്മുടെ സമൂഹം അവരുടെ മുഖവും മുറിവുകളും, അവരുടെ പുഞ്ചിരിയും ജീവിതവും കാണാതിരിക്കരുതെന്നും, ദൈവസ്നേഹത്തിന്‍റെ കരുണാതൈലം അവരുടെ മുറിവുകളെയും, വേദനകളെയും സുഖമാക്കട്ടെയെന്നും പാപ്പാ പ്രത്യാശിച്ചു. സുവിശേഷവൽക്കരണം എന്നത് നമ്മെ ഒറ്റ കുടുംബമാക്കുന്ന ദൈവപിതാവിന്‍റെ കരുണയുടെയും സൗഖ്യത്തിന്‍റെയും ആലിംഗനത്തിന് വാതിൽ തുറന്നുകൊടുക്കയാണെന്ന് ഒരു മിഷനറി ശിഷ്യൻ തിരിച്ചറിയണമെന്നും, ആദ്യകാല മിഷനറിമാരുടെ കാലടികൾ പിഞ്ചെന്ന് ഇനിയും ഞായറാഴ്ച മേശയിലെത്തിക്കാൻ കർത്താവു തരുന്ന അമ്മമാരേയും സഹോദരരേയും കണ്ടെത്താൻ പരിശ്രമിക്കണമെന്നും പാപ്പാ ആഹ്വാനം ചെയ്തു.

ബാങ്കോക്കില്‍ വിശുദ്ധ പത്രോസിന്‍റെ നാമധേയത്തിലുള്ള ഇടവക ദേവാലയത്തിൽ വച്ച് വൈദീകരും, സന്ന്യസ്തരും, വൈദീക വിദ്യാർത്ഥികളും മതാദ്ധ്യാ പകരുമായുള്ള കുടിക്കാഴ്ച്ചയില്‍ പാപ്പാ നല്‍കിയ പ്രഭാഷണം. വൈദീകരും, സന്ന്യസ്തരും, വൈദീക വിദ്യാർത്ഥികളും മതാദ്ധ്യാപകരുമായുള്ള സമ്മേളനത്തിന് ബിഷപ്പ് ജോസഫിന് നന്ദി പറഞ്ഞ പാപ്പാ തന്‍റെ ജീവിത്തെ കുറിച്ച് സാക്ഷ്യം പറഞ്ഞ ബെനതീത്തയ്ക്ക് ആശംസകളർപ്പിച്ച് അവളുടെ സാക്ഷ്യത്തിൽ നിറഞ്ഞു നിന്ന ഉപവിയുടെ സഹോദരികളിലൂടെ അവൾക്ക് ലഭിച്ച പ്രചോദനത്തിന്‍റെ ചുവടുപിടിച്ച് നമുക്ക് മുന്നേ ജീവിതസാക്ഷ്യം നല്‍കിയ മുതിർന്ന സന്യാസിനീ സന്യാസികൾക്കും മറ്റു പ്രായാധിക്യത്താൽ അവിടെ സന്നിഹിതരാകാൻ കഴിയാതിരുന്നവർക്കും ആശംസകളർപ്പിച്ച് അവരെ നന്ദിയോടെ അനുസ്മരിക്കേണ്ടതിന്‍റെ ആവശ്യകതയെ ഓർമ്മിപ്പിക്കുകയും ചെയ്തു.കാരണം ഓരോരുത്തരുടേയും ദൈവവിളിയുടെ ചരിത്രത്തിൽ ഇത്തരം വ്യക്തികൾ നമ്മെ ആത്മാവിന്‍റെ അഗ്നി കണ്ടെത്തി വിശകലനം ചെയ്യാൻ സഹായിച്ചവരാണ്. നന്ദി ഒരു ശക്തിയേറിയ ആയുധമാണെന്നും, ദൈവം നമുക്ക് അവന്‍റെ സ്നേഹവും വിശാല ഹൃദയവും, ക്ഷമയും മറ്റും കാണിച്ചു തന്ന വഴികളെ നന്ദിയോടെ സ്മരിക്കുക വീണ്ടും ഉന്മേഷത്തോടെ നമ്മുടെ ജീവിതവും പ്രേഷിത പ്രവർത്തനവും നവീകരിക്കാൻ ഇടയാക്കുമെന്നും പാപ്പാ ഓർമ്മിപ്പിച്ചു. പ്രേഷിതത്വത്തെ എങ്ങനെ ഫലപ്രദമാക്കാം? പ്രേഷിതത്വത്തെ എങ്ങനെ ഫലപ്രദമാക്കാമെന്ന് ചോദിച്ച് വിശദീകരിച്ച ഫ്രാൻസിസ് പാപ്പാ ആശ്ചര്യങ്ങളോടു തുറവിയില്ലാത്ത സമർപ്പിത ജീവിതം ഒരു മുഴുവൻ ജീവിതമാവില്ല എന്നും, ദൈവം നമ്മെ വിളിച്ച് ലോകത്തിലേക്ക് പറഞ്ഞയക്കുന്നത് ജനങ്ങളിൽ കടമകളും, അവർക്കുള്ളതിനേക്കാൾ കൂടുതല്‍ ഭാരങ്ങളും അടിച്ചേൽപ്പിക്കാനല്ല മറിച്ച് സന്തോഷമുള്ളതും മനോഹരമായതും ആശ്ചര്യകരവുമായ ഒരു പുതിയ ചക്രവാളം പങ്കിടുവാനാണെന്ന് പറഞ്ഞ് ബെനഡിക്ട് പതിനാറാമന്‍ പാപ്പായുടെ "സഭ വളരുക മതപരിവർത്തനം മൂലമല്ല മറിച്ച് ആകർഷിക്കപ്പെടലിലൂടെയാണ്" എന്ന വാക്കുകൾ ഉദ്ധരിച്ചു. Evangeli Gaudium 167 കൂടി കൂട്ടിച്ചേർത്ത് പുതിയ പ്രതീകങ്ങളേയും, രൂപങ്ങളേയും നോക്കാനും സുവിശേഷത്തെ സാംസ്കാരികവൽക്കരിക്കാന്‍ ഭയപ്പെടരരുതെന്നും, കർത്താവിനെ അറിയാൻ ആഗ്രഹം ജനിപ്പിക്കുന്ന, ക്രൂശിതനായ അവനെ അനുഗമിക്കുന്നവർ ആരെന്നറിയാൻ ആകാംക്ഷ ജനിപ്പിക്കുന്ന പുതിയ വഴികൾ തേടണമെന്നും പാപ്പാ ഉദ്ബോധിപ്പിച്ചു. വിശ്വാസത്തിന് തായ് മുഖവും, തായ് ശരീരവും നൽകണം ഈ ഒരു സമ്മേളനത്തിനായി ഒരുങ്ങിയപ്പോൾ ക്രിസ്തീയത ഒരുപാട് പേർക്ക് ഒരു വിദേശമതമാണെന്നും, വിദേശികൾക്ക് വേണ്ടിയുള്ള മതമാണെന്നും വേദനയോടെ വായിക്കാനിടയായത് ഓർമ്മിച്ച പാപ്പാ വിശ്വാസത്തെ ഒരമ്മ കുഞ്ഞിന് പാടുന്ന താരാട്ടു പോലെ, ഗ്രാമ്യഭാഷയിൽ നൽകാനും, വെറും തർജ്ജമയാക്കാതെ വിശ്വാസത്തിന് ഒരു തായ് മുഖവും, തായ് ശരീരവും നൽകി സുവിശേഷത്തിന്‍റെ വിദേശ അള്ളിപിടുത്തം (foreign grab) മാറ്റാൻ ആവശ്യപ്പെട്ടു. മറിയത്തിന്‍റെ നോട്ടത്തിലേക്ക് നോക്കുന്ന നമ്മൾ അവൾ നോക്കിയതിന്‍റെ നോട്ടത്തിലക്ക് ശ്രദ്ധിച്ച് അവള്‍ ചെയ്തതുപോലെ വെറും കാഴ്ചകളിൽ നിന്ന് ഉൾക്കാഴ്ചകളിലേക്ക് കടന്ന് എല്ലാ വ്യക്തികളുടേയും യഥാർത്ഥ സൗന്ദര്യം കാണാൻ കഴിയണം. പാപിയെയും, ദൈവദൂഷകനേയും, ചുങ്കക്കാരനേയും, തിന്മയോ ചതിയോ ചെയ്യുന്നവനേയും കണ്ടപ്പോൾ അവരിൽ യേശു അപ്പോസ്തലൻമാരെ കണ്ട നോട്ടമാണ് നാം സ്വായത്തമാക്കേണ്ടത് അങ്ങനെ ഓരോരുത്തരുടെയും നന്മ പുറത്തു കൊണ്ടവരുവാൻ നമുക്ക് കഴിയും. കർത്താവിന്‍റെ കരുണയുടെ ജീവിക്കുന്ന അടയാളങ്ങള്‍ നിങ്ങളുടെ ദൈവവിളിയുടെ ആദ്യകാലങ്ങളിൽ ദൈവവചനം പ്രാവർത്തീക പഥത്തിലെത്തിക്കാൻ നഗരങ്ങളിലെ വഴികളിൽ തഴയപ്പെട്ടവരെ ശുശ്രൂഷിച്ചവരാണ് നിങ്ങളിൽ പലരും. അവരെ അനാഥരോ, തൊട്ടു കൂടാത്തവരോ ആയിക്കാണാതെ നമ്മുടെ സഹോദരീ സഹോദരന്മാരായി, അവരിൽ "കർത്താവിനാൽ രക്ഷിക്കപ്പെട്ട സഹോദരന്‍റെയും സഹോദരിയുടേയും മുഖമുണ്ടെന്നറിയുകയാണ് ക്രിസ്ത്യാനി ചെയ്യേണ്ടത്. ഇങ്ങനെ നിങ്ങൾ കർത്താവിന്‍റെ കരുണയുടെ ജീവിക്കുന്ന അടയാളമാകുന്നു. അത് പരിശുദ്ധന്‍റെ അഭിഷേകത്തിന്‍റെ അടയാളവുമാണ്. ഇത്തരം ഒരു അഭിഷേകം പ്രാർത്ഥന ആവശ്യപ്പെടുന്നു എന്ന പറഞ്ഞ പാപ്പാ അപ്പോസ്തോലിക പ്രവർത്തനം ഫലമണിയാൻ വേണ്ട അഗാധമായ പ്രാർത്ഥനയുടെ ആവശ്യകതയെക്കുറിച്ചാണ് തുടര്‍ന്ന് സംസാരിച്ചത്. പ്രാർത്ഥനയില്ലാത്ത പ്രേഷിതപ്രവർത്തനം വ്യര്‍ത്ഥമാണ് പ്രാർത്ഥനയില്ലെങ്കില്‍ നമ്മുടെ ജീവിതത്തിന്‍റെയും പ്രേഷിത പ്രവർത്തനത്തിന്‍റെയും എല്ലാ അർത്ഥവും ശക്തിയും ആവേശവും നഷ്ടപ്പെട്ടതായിത്തീരും. ഉൽസാഹമില്ലായ്മയാണ് സുവിശേഷവൽക്കരണത്തിന്‍റെ ഏറ്റവും വലിയ പ്രതിസന്ധി എന്ന വിശുദ്ധ പോള്‍ ആറാമൻ പാപ്പായുടെ വാക്കുകൾ ഉദ്ധരിച്ച പാപ്പാ സന്യാസികൾക്കും, വൈദീകർക്കും, മതാദ്ധ്യാപകർക്കും ഈ ഉൽസാഹം കര്‍ത്താവിന്‍റെ മുഖദർശനവും, സഹോദരീ സഹോദരരുടെ മുഖദർശനവുമാക്കുന്ന രണ്ടു തരം കണ്ടുമുട്ടലുകളിലൂടെയാണ് പുഷ്ടിപ്പെടുന്നതെന്ന് സൂചിപ്പിച്ചു. ഉത്തരവാദിത്വങ്ങളുടെ മരീചികകളിൽ അലയുമ്പോൾ ശാന്തമായ ഒരിടം തേടി പ്രാർത്ഥനയിലായിരിക്കാന്‍ നമുക്ക് കഴിയണം. കർത്താവു ലോകത്തെ രക്ഷിച്ചു കഴിഞ്ഞെന്നും ആ രക്ഷ സകലർക്കും അനുഭവവേദ്യമാക്കാനാണ് നമ്മോടാവശ്യപ്പെടുന്നതെന്ന് ഫ്രാൻസിസ് പാപ്പാ അവരെ ഓർമ്മിപ്പിച്ചു. അവരുടെ ജീവിതങ്ങൾക്കും, സാക്ഷ്യങ്ങൾക്കും ഒരിക്കൽക്കൂടി നന്ദി പറഞ്ഞ പാപ്പാ അവർ എണ്ണത്തിൽ കുറവാണെന്ന പ്രലോഭനത്തിൽ വീഴാതെ, കർത്താവിന്‍റെ കരത്തിലെ എളിയ ഉപകരണമാണെന്ന് ചിന്തിക്കാനും ജീവിതം കൊണ്ട് ദൈവം ഈ നാട്ടിലെ രക്ഷാചരിത്രത്തിന്‍റെ ഏറ്റം മനോഹര താളുകൾ എഴുതുകയാണെന്നും അറിയിച്ചു. തനിക്ക് വേണ്ടി പ്രാർത്ഥിക്കാനും മറ്റുള്ളവരോടു പ്രാർത്ഥന അഭ്യർത്ഥിക്കാനും ആവശ്യപ്പെട്ടുകൊണ്ടു പാപ്പാ തന്‍റെ പ്രഭാഷണം ഉപസംഹരിച്ചു.

തായ്‌ലന്‍റ് മെത്രാൻമാരുമായും, ഏഷ്യൻ മെത്രാൻ സമിതി ഫെഡറേഷനുമായി വാഴ്ത്തപ്പെട്ട നിക്കോലാസ് ബൂങ്ങ് കേർട് കിറ്റ് ബാംറങ്ങ് തീർത്ഥാടന ദേവാലയത്തിൽ വച്ച് നല്‍കിയ പ്രഭാഷണം ദൈവത്തിന്‍റെ വിശുദ്ധരും വിശ്വസ്ഥരുമായ ജനത്തിന്‍റെ അജപാലകർ എന്ന നിലയിൽ അഭിമുഖികരിക്കുന്ന വെല്ലുവിളികളിലും, സന്തോഷങ്ങളിലും, പ്രത്യാശയിലും, സ്വപ്നങ്ങളിലും, സംരംഭങ്ങളിലും പങ്കുകൊള്ളുന്നതിൽ താൻ സന്തോഷിക്കുന്നുവെന്നും തനിക്കു നൽകിയ സ്വാഗതത്തിനും കരുണാദ്രമായ വാക്കുകൾക്കും കാർഡിനൽ ഫ്രാൻസിസ് സേവ്യർ ക്രിയേങ്‌സാക് കോവിതാവാൻജിനു നന്ദി അർപ്പിച്ചു. വാഴ്ത്തപ്പെട്ട നിക്കോളസ് ബങ്കർഡ് കിറ്റ്ബാംറുങ് നാം ഇന്ന് സമ്മേളിച്ചിരിക്കുന്ന വാഴ്ത്തപ്പെട്ട നിക്കോളസ് ബങ്കർഡ് കിറ്റ്ബാംറുങിന്‍റെ ദേവാലയത്തിലാണ്. സുവിശേഷവത്ക്കരണത്തിനും മതബോധനത്തിനുമായി തന്‍റെ ജീവിതം സമർപ്പിക്കുകയും ക്രിസ്തു ശിഷ്യരെ രൂപപ്പെടുത്തുകയും ചെയ്ത് പ്രാഥമികമായി തായ്‌ലന്‍റിലും പിന്നീട് വിയറ്റ്നാമിലും ലാവോസിന്‍റെ അതിർത്തിയിലും സുവിശേഷവത്കരണം ചെയ്ത അദ്ദേഹം രക്തസാക്ഷിത്വ മകുടം ചൂടി ക്രിസ്തുവിനു സാക്ഷ്യം വഹിചുവെന്നു ഓർമ്മിപ്പിച്ചു. അദ്ദേഹത്തിന്‍റെ മഹത്തായ സംരക്ഷണയിൽ നമ്മുടെ ഈ കൂടിക്കാഴ്ചയെ സമർപ്പിക്കാം. വാഴ്ത്തപ്പെട്ട നിക്കോളസിന്‍റെ മാതൃക ഏഷ്യയിലെ എല്ലാ പ്രാദേശിക സഭകളിലും സുവിശേഷവത്ക്കരണത്തിനുള്ള വലിയ തീക്ഷ്ണതയോടെ പ്രവർത്തിക്കാൻ നമ്മെ പ്രചോദിപ്പികട്ടെ. അങ്ങനെ നമ്മുടെ കർത്താവിന്‍റെ പ്രേഷിത ശിഷ്യന്മാരായിത്തീരാനും, അവന്‍റെ സുവിശേഷ സുഗന്ധം ഈ മഹത്തായ ഭൂഖണ്ഡത്തിലുടനീളം പ്രചരിപ്പിക്കാനും നമ്മെ പ്രാപ്തരാക്കും. പാപ്പാ പ്രഭാഷണത്തില്‍ സൂചിപ്പിച്ചു. വൈവിധ്യങ്ങളില്‍ പ്രേഷിത പ്രവര്‍ത്തനം ഏഷ്യൻ മെത്രാൻ സമിതി സ്ഥാപിതമായതിന്‍റെ അമ്പതാം വാർഷീകം പ്രമാണിച്ചു ആസൂത്രണം ചെയ്യന്ന പദ്ധതികളെ കുറിച്ച് ബോധവാനാണെന്നു പറഞ്ഞ പാപ്പാ മിഷനറിമാർ തങ്ങളുടെ പ്രേഷിത്വത്തിന്‍റെ മുദ്ര പതിപ്പിച്ച അവരുടെ വേരുകൾ സംരക്ഷിക്കപ്പെടുന്ന തീർഥാടനസ്ഥലങ്ങളെ വീണ്ടും സന്ദർശിക്കുന്നതിനും പരിശുദ്ധാത്മാവിൽ നമ്മുടെ ആദ്യ സ്നേഹത്തിന്‍റെ പാത ഉറപ്പിക്കുന്നതിനും, ഭാവിയെ സൃഷ്ടിക്കുന്നതിനും, സംരക്ഷിക്കുന്നതിനും സഹായിക്കുവാൻ അനുയോജ്യമായ സമയമാണ് ജൂബിലി വര്‍ഷമെന്നും പാപ്പാ ഓർമ്മപ്പെടുത്തി .സാംസ്കാരിക വൈവിധ്യങ്ങളും, ബഹു-മതങ്ങളും നിറഞ്ഞ ഒരു ഭൂഖണ്ഡത്തിന്‍റെ മധ്യത്തിലാണ് നിങ്ങള്‍ ജീവിക്കുന്നത്. ഒരേ സമയം വലിയ സമൃദ്ധി കൊണ്ട് സമ്പന്നരും എന്നാൽ വിവിധ തലങ്ങളിൽ ദാരിദ്ര്യവും ചൂഷണവും മൂലം വിഷമിക്കുന്നവരുമാണെന്ന് സൂചിപ്പിച്ച പാപ്പാ ദ്രുതഗതിയിലുള്ള സാങ്കേതിക മുന്നേറ്റങ്ങൾ ജീവിതത്തെ സുഗമമാക്കുന്ന അനേകം സാധ്യതകളെ തുറക്കുന്നുവെങ്കിലും അവ ഉപഭോക്തൃത്വത്തിന്‍റെയും ഭൗതികവാദത്തിന്‍റെയും വളർച്ചയ്ക്ക് കാരണമാകുന്നുവെന്നും പ്രത്യേകിച്ച് യുവജനങ്ങള്‍ക്കിടയിൽ വലിയ സ്വാധീനം ചെലുത്തുന്നുവെന്നും വ്യക്തമാക്കി. മയക്കുമരുന്നിന്‍റെയും മനുഷ്യക്കടത്തിന്‍റെയും പിടിയിൽ കഴിയുന്നവരുടെ മോചനം, ധാരാളം കുടിയേറ്റക്കാരുടെയും അഭയാർത്ഥികളുടെയും പരിചരണം, മോശമായ തൊഴിൽ സാഹചര്യങ്ങൾ, തൊഴിലാളികളായ നിരവധി പേര്‍ അനുഭവിക്കുന്ന ചൂഷണം, സമ്പന്നരും ദരിദ്രരും തമ്മിലുള്ള സാമ്പത്തികവും സാമൂഹികവുമായ അസമത്വം എന്നിങ്ങനെ ജനങ്ങള്‍ അനുഭവിക്കുന്ന ദുരിതങ്ങളെ സ്വയം ഏറ്റെടുത്ത് ഈ പിരിമുറുക്കങ്ങൾക്കിടയിൽ തങ്ങളുടെ ജനങ്ങള്‍ക്ക് വേണ്ടി, ജനങ്ങള്‍ക്കൊപ്പം പോരാടുകയും മാദ്ധ്യസ്ഥം വഹിക്കുകയും ചെയ്യുന്ന അജപാലകരാണ് നിങ്ങളെന്നും പാപ്പാ വെളിപ്പെടുത്തി. സുവിശേഷവത്ക്കരണത്തെ തടസ്സപ്പെടുത്തുന്നവയെ തിരിച്ചറിയണം നമുക്ക് മുമ്പുണ്ടായിരുന്ന ആദ്യത്തെ മിഷനറിമാരുടെ ഓർമ്മയും അവരിൽ നിറഞ്ഞിരുന്ന അസാധാരണമായ ധൈര്യവും, സന്തോഷവും കൂടുതൽ വിശാലവും പരിവർത്തനാത്മകവുമായ കാഴ്ച്ചപ്പാടോടേ നമ്മുടെ ഇന്നത്തെ സാഹചര്യത്തെയും ദൗത്യത്തെയും മനസ്സിലാക്കാൻ നമ്മെ സഹായിക്കും. പ്രധാനമായി കഴിഞ്ഞ കാലങ്ങൾ എപ്പോഴും സുവിശേഷപ്രഘോഷണത്തിന് കൂടുതൽ അനുകൂലമായിരുന്നു എന്ന വിശ്വാസത്തിൽ നിന്ന് ആ ഓർമ്മ നമ്മെ സ്വതന്ത്രമാക്കുന്നു. കൂടാതെ ഫലമില്ലാത്ത ചർച്ചകളിലും, നമ്മിൽ തന്നെ കേന്ദ്രീകരിച്ചു കൊണ്ട് നമ്മുടെ പ്രവർത്തനങ്ങളെ തളർത്തുന്ന മനോഭാവങ്ങളിൽ നിന്നും വിമുക്തമാകാനും നമ്മെ സഹായിക്കുന്നു. സഭയിലെ ചില ഘടനകളും, മനോഭാവങ്ങളും സുവിശേഷവത്ക്കരണത്തിനുള്ള ശ്രമങ്ങളെ തടസ്സപ്പെടുത്തുമെന്ന് നമുക്കറിയാം. എങ്കിലും നല്ല ഘടനകൾ പോലും സഹായകമാകുന്നത് ഒരു ജീവിതത്തെ നിരന്തരം ചലിപ്പിക്കുകയും നിലനിർത്തുകയും വിലയിരുത്തുകയും ചെയ്യുമ്പോൾ മാത്രമാണ്. ആത്യന്തികമായി, നവജീവിതവും, ആധികാരികമായ സുവിശേഷ ചൈതന്യവും, സഭയുടെ വിളിയോടുള്ള വിശ്വസ്ഥതതയും ഇല്ലാതെ, ഏതൊരു പുതിയ ഘടനയ്ക്കും ഉടൻ തന്നെ അത് ഫലപ്രദമല്ലെന്ന് തെളിയിക്കുവാൻ സാധിക്കും.(cf Evangelii Gaudium, 26).അതോടൊപ്പം നമ്മുടെ സുപ്രധാനപ്പെട്ട പ്രാർത്ഥനയുടെയും മദ്ധ്യസ്ഥതയുടെയും ശുശ്രൂഷയിൽ നിന്ന് നമ്മെ വ്യതിചലിപ്പിക്കുകയും ചെയ്യും. മിഷനറിമാരെ നയിക്കുന്ന പരിശുദ്ധാത്മാവ് രാജ്യങ്ങളിലെ നമ്മുടെ പ്രേഷിതപുരോഗതിയെക്കുറിച്ച് ചിന്തിക്കുമ്പോൾ പരിശുദ്ധാത്മാവ് നമുക്ക് മുന്നേ ചെന്ന് എല്ലാവരെയും ഒരുമിച്ചുകൂട്ടുന്നുവെന്ന അറിവിൽ ആത്മവിശ്വാസമുണ്ടായിരിക്കണം എന്ന ആദ്യ പാഠമാണ് നാം പഠിക്കേണ്ടത്. പുതിയ വിവരണങ്ങള്‍ രൂപപ്പെടുന്ന എല്ലാ സ്ഥലങ്ങളിലേക്കും പോകാൻ സഭയെ ആദ്യമായി ക്ഷണിച്ചത് പരിശുദ്ധാത്മാവാണ്. യേശുവിന്‍റെ വചനങ്ങളെ എല്ലാ നഗരങ്ങളുടെയും സംസ്കാരങ്ങളുടെയും അന്തരാത്മാവിലെത്തിക്കുന്നതും ആത്മാവാണ്(74). പരിശുദ്ധാത്മാവ് മിഷനറിമാരുടെ മുന്നിലൂടെ സഞ്ചരിച്ച് അവരോടൊപ്പം വസിക്കുന്നു. ഒരു ദേശത്തിന്‍റെയും, ജനത്തിന്‍റെയും, സംസ്കാരത്തിന്‍റെയും, സാഹചര്യത്തിന്‍റെയും പേരിൽ ആരെയും ഒഴിവാക്കാതെ എല്ലാവരിലും സുവിശേഷം എത്തിക്കാനായി അപ്പോസ്തലന്മാരെയും എണ്ണമറ്റ മിഷനറിമാരെയും പ്രേരിപ്പിച്ചു. അന്യസംസ്കാരം സുവിശേഷത്തെ എളുപ്പത്തിൽ സ്വീകരിക്കുമെന്ന് അവർ പ്രതീക്ഷിച്ചില്ല; മറിച്ച്, പുതിയ യാഥാർത്ഥ്യങ്ങളിലേക്ക് അവർ കടന്നു ചെല്ലുകയും, തങ്ങൾ നിർവ്വഹിക്കുന്ന പ്രേഷിതദൗത്യത്തിന്‍റെ സൗന്ദര്യത്തെ കുറിച്ച് ബോധവാന്മാരായിത്തീരുകയുമാണ് ചെയ്തത്. ക്രിസ്തുവിന്‍റെ മുൻഗണന നമ്മുടെയും മുൻഗണന ദൈവത്തിന്‍റെ കണ്ണുകളിൽ എല്ലാ ജീവിതത്തിനും മൂല്യമുണ്ട്. അപ്പോസ്തലന്മാരും, മിഷനറിമാരും ധൈര്യവുമുള്ളവരായിരുന്നു. കാരണം സുവിശേഷമെന്നത് നിയമജ്ഞരും, പാപികളും, ചുങ്കക്കാരും, വേശ്യകളുമായ എല്ലാവരുമായും പങ്ക് വയ്ക്കപ്പെടോണ്ട ഒരു ദാനമാണെന്ന് അവർ അറിഞ്ഞിരുന്നു. സഭയെ ഏൽപ്പിച്ച ദൗത്യം സുവിശേഷപ്രഘോഷണത്തിൽ മാത്രമല്ല, സുവിശേഷം വിശ്വസിക്കാനും അത് സ്വയം മുറുകെ പിടിക്കാനും പരിവർത്തനം ചെയ്യാനും നാം നമ്മെ അനുവദിക്കുകയെന്നതാണ് സുവിശേഷവത്ക്കരണത്തിന്‍റെ ഏറ്റവും സുപ്രധാനപ്പെട്ട ഘടകം. ഇതിനർത്ഥം, ദൈവവചനത്തിന്‍റെ വെളിച്ചത്തിൽ ജീവിക്കുകയും, ചരിക്കുകയും ചെയ്യുക എന്നതാണ്. ക്രിസ്തുവുമായുള്ള ഐക്യത്തിൽ നിന്ന് കൊണ്ട് ക്രിസ്തു അന്വേഷിക്കുന്നത് അന്വേഷിക്കാനും ക്രിസ്തു സ്നേഹിക്കുന്നതിനെ സ്നേഹിക്കുവാനും ക്രിസ്തു എന്തിനാണോ മുൻഗണന നൽകുന്നത് അതിനെ നമ്മുടെയും മുൻഗണനയായി സ്വീകരിക്കാനും ഭയപ്പെടരരുതെന്നും പാപ്പാ ആഹ്വാനം ചെയ്തു. മെത്രാന്‍റെ ഏറ്റവും അടുത്ത അയൽക്കാരൻ വൈദീകനായിരിക്കണം അജപാലകനായ ഒരു വ്യക്തി തന്‍റെ അജഗണത്തിന്‍റെ ബലത്തെയും ബലഹീനതയെയും ആഴത്തിൽ അറിയുന്നവനായിരിക്കണം. മെത്രാന്മാർ തങ്ങളുടെ വാതിലുകൾ പുരോഹിതർക്കായി തുറന്നിടണം. ഒരു മെത്രാന്‍റെ ഏറ്റവും അടുത്ത അയൽക്കാരൻ വൈദീകനാണെന്ന് മറക്കാതിരിക്കുക. മെത്രാന്മാർ അവരുടെ പുരോഹിതരെ ശ്രവിക്കുകയും എല്ലാ സന്ദര്‍ഭങ്ങളിലും പ്രത്യേകിച്ച് അവർ നിരുത്സാഹപ്പെടുന്ന അവസരങ്ങളിൽ അവരെ അനുയാത്ര ചെയ്യുകയും ന്യാധിപന്മാരാകാതെ നല്ല പിതാവായും ശ്രേഷ്ഠ സഹോരന്മാരെ പോലെയും അവരോടു പെരുമാറണമെന്ന് പാപ്പാ ആഹ്വാനം ചെയ്തു. പ്രത്യാശയും ആശ്രയബോധവും അനുഭവപ്പെടുന്ന ഒരു അന്തരീക്ഷം രൂപപെടുത്തണമെന്നും പാപ്പാ സൂചിപ്പിച്ചു. വിശുദ്ധ നിക്കോളാസിന്‍റെയും വിശുദ്ധരായ എല്ലാ പ്രേഷിതരുടെയും മാദ്ധ്യസ്ഥം അപേക്ഷിച്ചു കൊണ്ട് പാപ്പാ തന്‍റെ പ്രഭാഷണം ഉപസംഹരിച്ചു.